Ymchwiliad gan IOPC i saethu gan Heddlu Swydd Bedford

Rydym wedi dechrau ymchwiliad ar ôl i ddyn gael ei saethu a’i anafu’n ddifrifol gan Heddlu Swydd Bedford ddoe (8 Medi).

Galwyd yr heddlu i Stryd Cardigan, Luton, tua 12.50pm yn dilyn adroddiadau bod dyn yn bygwth menyw â chyllell.

Rydym wedi cadarnhau bod swyddogion ymateb arfog wedi mynd i’r digwyddiad, a bod un swyddog wedi tanio pedair ergyd ac un swyddog arall wedi tanio un rownd baton, a oedd yn ôl pob golwg wedi taro’r dyn unwaith yn y fraich ac unwaith yn y goes. Cafodd gymorth cyntaf yn y fan a’r lle ac yna fe’i cludwyd i’r ysbyty ag anafiadau a fydd yn newid ei fywyd.

Cludwyd y fenyw hefyd i’r ysbyty gydag anafiadau trywanu, ac nid ystyrir bod ei chyflwr yn peryglu ei bywyd.

Fe wnaethom ddatgan ymchwiliad annibynnol ychydig cyn 2pm ac anfon ymchwilwyr i leoliad y saethu yn ogystal â’r weithdrefn ar ôl y digwyddiad (PIP), lle rhoddodd y swyddogion arfau tanio dan sylw eu cyfrifon cychwynnol o’r hyn a ddigwyddodd.

Cynhaliwyd hefyd y broses gyfrif arfau tanio o’r bwledi a ddefnyddiwyd, sef pan gaiff nifer y rowndiau a daniwyd ei chadarnhau, yn y PIP ym mhresenoldeb ymchwilydd o’r IOPC.

Dywedodd Emily Barry, Cyfarwyddwr Ymgysylltu’r IOPC:

“Mae defnydd o arfau tanio gan swyddogion heddlu yn beth prin, ond pan fydd grym a allai fod wedi bod yn farwol wedi’i ddefnyddio, mae’n bwysig ein bod yn cynnal ymchwiliad annibynnol i’r amgylchiadau.

“Gallwn gadarnhau ar hyn o bryd fod pob un o’r swyddogion dan sylw yn cael eu trin fel tystion gan nad oes unrhyw arwydd y gallent fod wedi torri safonau proffesiynol yr heddlu nac wedi cyflawni trosedd.

“Rydym yng nghyfnod cychwynnol ein hymchwiliad, sy’n edrych ar weithredoedd a phenderfyniadau’r swyddogion, gan gynnwys defnydd yr heddlu o arfau tanio ac a oedd unrhyw ddefnydd o rym yn rhesymol, yn angenrheidiol ac yn gymesur.”

Rydym wedi diogelu arfau tanio’r heddlu i’w harchwilio, ac mae deunydd CCTV a fideo camerâu corff-wisgedig y swyddogion wedi’i adolygu.