Ein gwaith

Mae'r wybodaeth yn yr adran hon hefyd ar gael mewn fformat 'hawdd i'w ddarllen'

Rydym yn goruchwylio system gwynion yr heddlu yng Nghymru a Lloegr, gan osod y safonau y dylai’r heddlu ymdrin â chwynion yn eu herbyn. Rydym yn ymchwilio i’r materion mwyaf difrifol, gan gynnwys honiadau o lygredd difrifol, ac achosion lle mae rhywun wedi marw neu wedi’i anafu’n ddifrifol yn dilyn cyswllt â’r heddlu.  Rydym hefyd yn ystyried rhai mathau o adolygiadau gan bobl sy'n anhapus â'r ffordd yr ymdriniwyd â'u cwyn.

Rydym yn chwarae rôl hanfodol mewn gwella ymarfer yr heddlu trwy sicrhau bod yr heddlu yn atebol am eu gweithredoedd a bod gwersi’n cael eu dysgu. Gan weithio gyda’n partneriaid, defnyddwyr gwasanaeth a chymunedau, rydym yn defnyddio tystiolaeth o’n gwaith i ddylanwadu ar ac ysgogi newidiadau i blismona, yn enwedig ar faterion y gwyddom eu bod yn effeithio ar hyder y gymuned a’r cyhoedd.  Un enghraifft o hyn yw ein ffocws ar wahaniaethu hiliol mewn plismona ac ar ymateb yr heddlu i drais yn erbyn menywod a merched.

Fel rhan o’n gwaith goruchwylio ehangach, rydym yn darparu canllawiau i helpu’r heddlu i ymdrin â chwynion ar lefel leol. Rydym hefyd yn monitro perfformiad adrannau safonau proffesiynol heddluoedd ac yn eu dwyn i gyfrif am eu perfformiad wrth ymdrin â chwynion.

Ynghyd ag Arolygiaeth Cwnstabliaeth a Gwasanaethau Tân ac Achub Ei Fawrhydi (HMICFRS) a’r Coleg Plismona rydym yn asesu ac yn ymateb i uwch-gwynion.  Gwneir uwch-gwynion gan amrywiaeth o sefydliadau am faterion eang neu systemig a allai effeithio ar hyder y cyhoedd mewn plismona.

Mae gennym hefyd bwerau mewn perthynas â nifer o sefydliadau eraill nad ydynt yn heddluoedd ond sydd â phwerau tebyg i’r heddlu, ac rydym yn ymchwilio i honiadau troseddol yn erbyn comisiynwyr heddlu a throseddu a’u dirprwyon.