Cyn-ringyll heddlu o Swydd Gaergrawnt a gynhaliodd ddiwylliant tîm tocsig wedi’i ganfod yn euog o gamymddwyn mewn swydd gyhoeddus

Mae cyn-ringyll heddlu Swydd Gaergrawnt a ffilmiodd ei hun yn gwneud bygythiadau a fwriadwyd i'w dangos i blentyn yn y ddalfa, a ofynnodd am ddelweddau anweddus o aelod o'r cyhoedd gan gydweithiwr, ac a gynhaliodd ddiwylliant tocsig ymhlith ei dîm, wedi'i ganfod yn euog o gamymddwyn mewn swydd gyhoeddus (MIPO) yn dilyn achos llys yn yr Old Bailey.

Yn dilyn ymchwiliad a gyfarwyddwyd gan Swyddfa Annibynnol Ymddygiad yr Heddlu (IOPC), cafwyd y cyn-ringyll heddlu Paul Street, 41 oed, yn euog o ddau gyhuddiad o MIPO. Plediodd yn euog yn flaenorol i ddau gyhuddiad o dan y Ddeddf Diogelu Data. Ffeindiodd rheithgor ei fod yn ddieuog o ymosodiad a achosodd wir niwed corfforol a gwyrdroi cwrs cyfiawnder.

Street – a ymddiswyddodd o'r heddlu ym mis Chwefror 2024 – oedd y sarsiant a oedd yn arwain Tîm Effaith ar Gymdogaeth y de a oedd wedi'i leoli yng ngorsaf Heddlu Cambourne, gyda'r tîm yn targedu grwpiau sy'n delio â chyffuriau a throseddu cyfundrefnol.

Nododd archwiliadau o ffôn Street, yn dilyn ymchwiliad i fater ar wahân, negeseuon WhatsApp o fis Ebrill 2020 lle roedd Street yn annog cydweithwyr i fwlio plentyn, a oedd wedi cael ei gadw a'i chwilio'n noeth ar amheuaeth o fod â chyffuriau yn ei feddiant. Roedd y negeseuon yn annog defnyddio trais yn erbyn y bachgen 17 oed, gan gynnwys “malu ei ben bach i mewn”. Hefyd, ffilmiodd a rhannodd fideo ohono'i hun yn defnyddio iaith sarhaus ac yn gwneud bygythiadau a fwriadwyd i'w dangos i'r plentyn. Cafodd ei euogfarnu o MIPO am ei weithredoedd.

Roedd y drosedd MIPO arall yn ymwneud â digwyddiad lle'r oedd cydweithiwr Street – y Cwnstabl Josh Williams – yn lawrlwytho ffôn menyw a gafodd ei ffôn ei hatafaelu ac yr oedd amheuaeth ei bod yn rhan o ddelio cyffuriau. Roedd y ddynes wedi rhybuddio'r swyddogion a oedd yn ei harestio fod lluniau preifat, anaddas ar ei ffôn oherwydd ei bod hi eisiau sicrhau nad oeddent yn cael eu rhannu.

Ar 1 Hydref 2020, anfonodd Williams neges at Street i ddweud wrtho am gynnwys y ffôn. Gofynnodd Street i Williams a oedd “unrhyw luniau noeth?”. Roedd y cyfnewidiad WhatsApp yn dangos bod Williams wedi tynnu llun o rôl camera'r ddynes yn dangos nifer o ddelweddau ohoni mewn dillad isaf ac wedi'i anfon ymlaen at Street. Dywedodd Williams wrtho hefyd am fideo personol ar y ffôn a chwe mis yn ddiweddarach, anfonodd Street neges at Williams yn gofyn a oedd ganddo'r fideo o hyd er mwyn iddo allu "dangos i'r hogiau o’r pêl-droed".

Plediodd Williams yn euog i MIPO yn flaenorol am rannu'r ddelwedd o ffôn y ddynes a bydd yn wynebu dedfryd ochr yn ochr â Street, a fydd yn cael ei gadw yn y ddalfa tan y dedfrydu.

Dywedodd Cyfarwyddwr Ymgysylltu’r IOPC, Emily Barry: “Fel y rhingyll mewn gofal, creodd Paul Street ddiwylliant tîm tocsig y byddai swyddogion iau yn ei chael hi’n anodd iawn i’w herio. Gosododd ei negeseuon a'i ymddygiad y naws gan feithrin diwylliant annerbyniol lle ymunodd swyddogion is i gyfnewid negeseuon amhriodol. Pan wnaeth un o'r swyddogion hynny'r peth iawn ac adrodd am ymddygiad Street, cyfeiriodd at y swyddog yn sgwrs grŵp y tîm fel 'neidr'.

“Camddefnyddiodd ei swydd fel swyddog heddlu, gan gynnwys ffilmio ei hun yn gwneud bygythiadau gyda’r bwriad o’u dangos i blentyn yn y ddalfa.

“Mae’r fenyw y rhannwyd ei lluniau personol rhwng Williams a Street – heb unrhyw ddiben plismona o gwbl – wedi siarad am ei gofid o wybod bod ei delweddau preifat wedi cael eu rhannu gan swyddogion a sut mae hyn wedi tanseilio ei hymddiriedaeth yn yr heddlu yn llwyr. Yn warthus, camddefnyddiodd Street ei swydd ymhellach drwy ofyn am y fideo er mwyn iddo allu ei rannu â'i ffrindiau.

“Ceisiodd gyfiawnhau neu esgusodi ei ymddygiad a gwadu unrhyw droseddu.” Mae bellach wedi cael ei ddwyn i gyfrif a bydd yn cael ei ddedfrydu am ei droseddau.”

Dechreuodd ein ymchwiliad cyfeiriedig ym mis Hydref 2022 ac fe'i cynhaliwyd gan adran safonau proffesiynol Swydd Bedford, Swydd Gaergrawnt a Swydd Hertford o dan ein cyfarwyddyd a'n rheolaeth. Ym mis Mawrth 2024, penderfynon ni gyfeirio ffeil o dystiolaeth at Wasanaeth Erlyn y Goron, a awdurdododd y cyhuddiadau yn erbyn Street a Williams.

Cafodd PC Williams ei ddiswyddo heb rybudd mewn gwrandawiad cyflym ar ôl pledio'n euog i MIPO y llynedd ac mae wedi'i roi ar restr wahardd y Coleg Plismona.  Bydd cyn-PS Street yn wynebu gwrandawiad uwch-gyfeiriedig yn dilyn diwedd yr achos troseddol.

Arweiniodd tystiolaeth a gafwyd drwy lawrlwythiad ffôn Street at ehangu'r ymchwiliad i gynnwys swyddogion eraill a oedd yn rhan o gyfnewid negeseuon amhriodol yn y grŵp WhatsApp.

Cafodd dau swyddog arall ganfyddiadau o gamymddwyn difrifol yn dilyn gwrandawiadau disgyblu.

Cafodd y Cwnstabl Steve Girdlestone ei ddiswyddo heb rybudd am ddefnyddio iaith wahaniaethol a difrïol am aelodau'r cyhoedd mewn negeseuon WhatsApp.

Derbyniodd PC Amadae Dowd rybudd ysgrifenedig terfynol am gamymddwyn difrifol am rannu delweddau o blentyn ac oedolyn wedi'u hanafu ar negeseuon WhatsApp heb ddiben plismona.

Canfuwyd bod gan bedwar swyddog arall achos i'w ateb am gamymddwyn a rhoddwyd pump o swyddogion o dan y broses adolygu arfer myfyriol – gan ddod â chyfanswm y swyddogion dan gweithdrefnau disgyblu neu berfformiad i 13 o swyddogion.

Ychwanegodd Ms Barry: “Ehangodd yr hyn a ddechreuodd fel ymchwiliad i ymddygiad Street yn sylweddol i gynnwys mwy na dwsin o swyddogion ar ôl i ni ddod o hyd i negeseuon WhatsApp annerbyniol ac amhriodol a gyfnewidiwyd rhwng swyddogion ar ffôn Street a methiant swyddogion i gyflawni eu dyletswydd i adrodd neu herio’r ymddygiad hwn. Dylid cydnabod y swyddog a adroddodd am Street am sefyll dros yr hyn sy'n iawn.

“Mae’n hanfodol bod ymddygiad swyddogion heddlu sy’n disgyn ymhell islaw’r safonau y byddai’r cyhoedd yn eu iawn ddisgwyl – fel negeseuon difrïol a rhannu delweddau o aelodau’r cyhoedd heb unrhyw reswm dilys – yn cael ei drin a’i drafod fel bod y swyddogion yn cael eu dwyn i gyfrif.”