Ymchwiliad yn dilyn marwolaeth dyn a gafodd ei gadw yn Stoke-on-Trent

Mae Swyddfa Annibynnol Ymddygiad yr Heddlu (IOPC) yn ymchwilio ar ôl i ddyn farw tra oedd yn nalfa Heddlu Swydd Stafford.

Fe wnaeth Heddlu Swydd Stafford ein hysbysu tua 9.15pm ar 17 Mawrth (2026) fod Calvin Davies, a oedd yn 41 oed, wedi mynd yn sâl ac wedi marw ar ôl cael ei gadw yn Nalfa Ardal y Gogledd yn Etruria yn gynharach y noson honno.

Rydym wedi sefydlu bod Mr Davies wedi cael ei arestio mewn cyfeiriad yn Stoke-on-Trent ychydig ar ôl 5.30pm yn dilyn galwad i'r heddlu gan aelod o'r cyhoedd. Tra roedd yn y ddalfa, gwaethygodd ei gyflwr a galwyd am ambiwlans. Yn anffodus, cyhoeddwyd ei farwolaeth tua 8.20pm tra roedd parafeddygon yn dal yn y fan a'r lle.

Ar ôl i Heddlu Swydd Stafford gysylltu â ni, fe wnaethon ni anfon ymchwilwyr i'r uned ddalfa a gweithdrefn ôl-ddigwyddiad heddlu i ddechrau casglu gwybodaeth. Fe wnaethon ni ddatgan ymchwiliad annibynnol y bore canlynol. Mae swyddogion wedi darparu adroddiadau cychwynnol, ac rydym hefyd yn casglu ffilmiau CCTV a fideo corff-gamera i'w hadolygu.

Dywedodd Cyfarwyddwr IOPC, Derrick Campbell: “Mae ein meddyliau gyda theulu ac anwyliaid Mr Davies. Gan yr oedd yn nalfa’r heddlu ar y pryd y dechreuodd deimlo'n sâl, mae'n bwysig bod ymchwiliad trylwyr ac annibynnol yn cael ei gynnal.

“Byddwn yn archwilio amgylchiadau’r arestio, gan gynnwys unrhyw ddefnydd o rym, ei oruchwyliaeth tra yn y ddalfa, ac a gafodd polisïau a gweithdrefnau perthnasol yr heddlu eu dilyn.

“Rydym wedi siarad â theulu Mr Davies i’w gwneud yn ymwybodol o’n rôl a byddwn yn eu hysbysu wrth i’n hymchwiliad fynd yn ei flaen.”

Mae Crwner EF wedi cael gwybod, a bydd cwest yn cael ei agor maes o law.