Diweddariad o ymchwiliad IOPC yn dilyn gwrthdrawiad fan heddlu ym Maryport

Mae Swyddfa Annibynnol Ymddygiad yr Heddlu (IOPC) yn ymchwilio'n droseddol i weithredoedd swyddog Heddlu Cumbria mewn cysylltiad â gwrthdrawiad ym Maryport lle anafwyd dau o blant.

Cawsom atgyfeiriad gan Heddlu Cumbria ar ôl y digwyddiad ar 18 Ebrill 2026, lle rholiodd cerbyd heddlu gwag i lawr allt a tharo dwy ferch.

Mae ein ymchwiliad, sy'n cael ei gynnal yn annibynnol o’r heddlu, wedi ymgymryd â gwaith ymchwiliol yn casglu ac yn adolygu tystiolaeth o'r lleoliad.

Yn seiliedig ar y wybodaeth sydd ar gael ar hyn o bryd, mae'r cwnstabl heddlu a oedd yn gyrru'r fan wedi cael gwybod eu bod dan ymchwiliad troseddol am y troseddau posib canlynol:

• Gadael cerbyd modur heb oruchwyliaeth yn groes i Reoliad 107 o Reoliadau Cerbydau Ffordd (Adeiladu a Defnyddio) 1986, a thrwy hynny cyflawni trosedd o dan Adran 42 o’r Ddeddf Traffig Ffyrdd 1988.
• Gadael cerbyd mewn safle peryglus yn groes i Adran 22 o Ddeddf Traffig Ffyrdd 1988.

Mae'r swyddog hefyd wedi derbyn hysbysiad o gamymddwyn difrifol am y posibilrwydd o fod wedi torri safonau ymddygiad proffesiynol yr heddlu, mewn perthynas â dyletswyddau, cyfrifoldebau, gorchmynion a chyfarwyddiadau. Nid yw cyflwyno hysbysiadau o reidrwydd yn golygu y bydd cyhuddiadau troseddol na gweithdrefnau disgyblu yn dilyn.

Dywedodd Cyfarwyddwr Ymgysylltu’r IOPC, Amanda Rowe: “Mae ein cydymdeimlad yn parhau gyda’r merched, eu ffrindiau a’u teuluoedd a phawb arall yr effeithiwyd arnynt. Gobeithiwn y bydd y merched yn parhau i wella'n dda o'r anafiadau a gafwyd.

“Ein rôl ni yw ymchwilio’n annibynnol i gyfranogiad yr heddlu yn y gwrthdrawiad hwn er mwyn sefydlu’r amgylchiadau. Mae'r hysbysiad ymddygiad yn ymwneud â gweithredoedd a phenderfyniadau'r swyddog, yn benodol arwydd y gallai'r swyddog fod wedi methu â pharcio’n gywir a diogelu'r fan, ac a oedd hynny'n unol â hyfforddiant, polisi a gweithdrefnau.

“Rydym wedi siarad â theuluoedd y merched i esbonio ein rôl a byddwn yn rhoi’r wybodaeth ddiweddaraf iddynt wrth i’n gwaith fynd yn ei flaen.”

Ar ôl i ni gael gwybod gan yr heddlu am y digwyddiad, mae ymchwilwyr IOPC wedi bod yn adolygu tystiolaeth gan gynnwys cael a dadansoddi camerâu CCTV, fideo a wisgir ar gorff yr heddlu a fideos dash-cam. Mae archwiliad o’r cerbyd hefyd wedi digwydd, gan ddangos nad oedd unrhyw ddiffygion ar y cerbyd.