Ymchwiliad IOPC yn dilyn marwolaeth yn Afon Lea

Mae Swyddfa Annibynnol Ymddygiad yr Heddlu (IOPC) yn ymchwilio i gysylltiad yr heddlu â dyn a fu farw ar ôl rhedeg i ffwrdd oddi wrth swyddogion a mynd i mewn i Afon Lea yn Swydd Hertford ar ddydd Llun 14 Medi.

Cafodd Myley French, 20 oed, gyfathrebiad byr â swyddogion Heddlu Swydd Hertford yn y Stryd Fawr, Stanstead Abbotts, oherwydd eu bod yn ei adnabod fel rhywun a oeddent ei eisiau am fethu ag ymddangos yn unol ag amodau mechnïaeth.

Fe wnaethon nhw ei stopio fe a siarad gyda fe am gyfnod byr cyn iddo redeg i ffwrdd oddi wrthynt.

Rydym wedi cadarnhau, ar ôl gwylio ffilm o gamerâu corff-wisgedig y swyddogion, fod swyddogion wedi mynd ar ei ôl ond wedi colli golwg arno’n gyflym ar ôl iddo ddringo dros ffens, cyn mynd i mewn i’r dŵr.

Cafodd swyddogion eu hysbysu gan aelod o’r cyhoedd oedd yn mynd heibio fod person yn y dŵr, a galwyd Gwasanaeth Tân ac Achub Swydd Hertford i’r lleoliad. Ar ôl chwilio’r afon, daethant o hyd i gorff ac, yn drist iawn, cafodd Mr French ei ddatgan yn farw yn y fan a’r lle.

Hysbyswyd Crwner Ei Fawrhydi a cafodd archwiliad post-mortem ei gynnal ar 22 Medi. Mae achos terfynol y farwolaeth yn dal i gael ei ddisgwyl, ac felly nid yw’r cwest wedi’i agor eto.

Rydym wedi casglu deunydd CCTV o’r ardal ac yn adolygu datganiadau swyddogion a throsglwyddiadau radio’r heddlu.

Rydym hefyd yn casglu datganiadau gan dystion a welodd Mr French yn yr afon.

Dywedodd Emily Barry, cyfarwyddwr ymgysylltu’r IOPC:

“Mae ein meddyliau gyda theulu ac anwyliaid Myley French a phawb arall y mae ei farwolaeth wedi effeithio arnynt.

“Gan ei fod wedi marw yn dilyn rhyngweithiad â swyddogion heddlu, mae angen i ni sefydlu’n annibynnol union amgylchiadau’r digwyddiad hwn a gweithredoedd y swyddogion dan sylw.

“Rydym wedi cyfarfod â theulu Myley i egluro ein rôl a byddwn yn eu diweddaru’n rheolaidd trwy gydol ein ymchwiliad.”

Ar ôl cael ein hysbysu gan yr heddlu, gwnaethon ni anfon ymchwilwyr i’r lleoliad ac i’r weithdrefn ôl-ddigwyddiad er mwyn dechrau casglu gwybodaeth. Fe wnaethom ddatgan ymchwiliad annibynnol ar 16 Medi.