Swyddog dan ymchwiliad troseddol yn dilyn gwrthdrawiad ar yr M53

Mae Swyddfa Annibynnol Ymddygiad yr Heddlu (IOPC) wedi hysbysu swyddog Heddlu Glannau Mersi eu bod dan ymchwiliad troseddol yn dilyn gwrthdrawiad ar yr M53 a adawodd ddyn mewn cyflwr difrifol.

Rydym yn ymchwilio'n annibynnol i amgylchiadau'r gwrthdrawiad, a ddigwyddodd ar y slipffordd traffordd wrth gyffordd dau ar 22 Mawrth.

Roedd beic modur, a oedd yn cael ei dracio gan hofrennydd heddlu ar y pryd, yn teithio i'r cyfeiriad anghywir ar hyd y llain galed pan gafodd wrthdrawiad uniongyrchol â cherbyd heddlu.

Ar ôl adolygu'r dystiolaeth sydd ar gael ar hyn o bryd, rydym wedi hysbysu gyrrwr y cerbyd heddlu eu bod yn cael eu hymchwilio am y drosedd bosib o achosi anaf difrifol trwy yrru'n beryglus. Maent hefyd dan ymchwiliad am gamymddwyn difrifol posib mewn perthynas â'u dull gyrru.

Dywedodd Cyfarwyddwr IOPC, Amanda Rowe:

“Roedd hyn yn ddigwyddiad difrifol iawn a adawodd ddyn mewn cyflwr critigol yn yr ysbyty. Rwy'n falch o glywed bod ei gyflwr wedi gwella. Fodd bynnag, bydd e’n parhau i dderbyn triniaeth am ei anafiadau.

“O ystyried yr amgylchiadau, mae’n bwysig cynnal ymchwiliad trylwyr ac annibynnol er mwyn i ni allu deall yn llawn y digwyddiadau a arweiniodd at y gwrthdrawiad.

“Mae’n bwysig cofio nad yw cyflwyno rhybudd i swyddog o reidrwydd yn golygu y bydd achos troseddol neu ddisgyblu yn dilyn. Ar ôl cwblhau'r ymchwiliad, byddwn yn penderfynu a ddylid atgyfeirio'r achos at Wasanaeth Erlyn y Goron, neu a oes angen gweithdrefnau camymddwyn.

Yn ogystal â chasglu fideos o'r digwyddiad, rydym wedi cael datganiad manwl gan dyst heddlu ac wedi cysylltu â nifer o aelodau'r cyhoedd rydym yn credu a allai fod wedi gweld y gwrthdrawiad ac a allai helpu gyda'n ymholiadau.